Pinirmaanen ni Presidente Ferdinand R. Marcos, Jr. ti Republic Act (R.A.) No. 12312 wenno Anti-POGO Act of 2025 nga opisial a mangiparit iti Philippine Offshore Gaming Operators (POGO) iti pagilain ken mangideklarar ti operasionda ken dadduma pay nga aktibidadda kas iligal.
Iti salinong ti nasao a linteg, maiparit ti panangipatakder, operasion, wenno panangisayangkat ti offshore gaming iti Pilipinas, pakairamanan ti panangawat ti aniaman a klase ti panagpusta para iti offshore gaming operations.
Imbilin pay ti linteg a permanente ti pannakakanselar dagiti amin a lisensia a naipaay para iti operasion ti POGO.
Iti salinong ti R.A. No. 12312, amin a POGO, ken dagiti POGO gaming content provider, accredited service provider, ken local gaming agent a nawaswas dagiti lisensiada ket agtalinaed nga agbayad iti buwis, duties, regulatory fees, ken amin a dadduma pay a charges agingga iti maudi nga aldaw ti operasionda.
Dagiti nasao a bambanag ket ‘due and payable’ iti gobierno para kadagiti obligasion a nagtaud manipud wenno maipanggep iti operasionda.
Nabilin met ti Bureau of Internal Revenue (BIR) “nga auditen dagiti tattao ken entidad” a mangikeddeng iti aniaman a saan pay a nabayadan a tax liabilities, iti laksid ti pannakaikkat dagiti lisensiada ken pannakaserra dagiti operasionda. Augie Arellano
