VIGAN CITY – Mapan dagiti amin a babbai nga agpanpanday linteg idiay Mindanao, nangruna kadagiti lugar a naapektaran kadagiti nagsasaruno a gingined inton November 18 ken 19 ta mapan da ited dagiti donasyon da.
Ti pannaki-uman ti Bombo Radyo Vigan, nadakamat ni ACT Teacher’s Partylist Rep. France Castro a malaksid kadagiti All Women Legislators, mapan to met dagiti kakadua na iti minorya idiay Mindanao inton December 6 agingga 8 ta mapan da ited dagiti donasyon da kadagiti umili a naapektaran kadagiti nagsasaruno a gingined.
Inaklon ni Castro a saan da pay laeng a napagpapatangan nu manu iti ited da a tulong tapnu masimpa dagiti pagadalan a nadadael ngem inkari na a ti kabiitan a panawen ket mapagpapatangan to idiay Kamara iti nasao a banag.
Immunan a nadakamat ti Department of Education (Deped) a dakkel a pondo iti kasapulan tapnu masimpa dagiti nadadael a pagadalan idiay Mindanao gapu kadagiti nagsasaruno a gingined.
