VIGAN CITY- Dead on the spot iti maysa kadagiti back ride ti kurong-kurong gapu iti napasamak nga aksidente a pakairaman ti dua a motorsiklo idiay Brgy. Mabilbila Norte, Santa, Ilocos Sur.
Nabigbig ti drayber ti Honda TMX nga agtawen iti sangpulon ket lima, idinto dagiti pasaheros na ket agtawen iti sangapulo ket pito, idinto ti natay ket agtawen iti sangapulo ket walo, agpapada nga agad-adal ken residente ti Brgy. Mabilbila Sur, Santa, Ilocos Sur.
Ti drayber ti motorsiklo a Raider Suzuki 150 ket ni Edrick Jay Ramirez Licayan, agtawen iti duapulo, idinto a ti drayber ti motorsiklo a Yamaha Sniper ket ni Mark Jay Bodoño Cardenás, agtawen iti duapulo ket pito, agpada nga agnaed iti nasao met laeng a barangay.
Iti pannaki-uman ti Bombo Radyo Vigan kenni Police Captain Mark Bryan Corpuz ti Santa Municipal Police Station, agpapa-abagatan a direksiyon dagiti lugan, immuna ti kurong-kurong idinto sumarsaruno met dagiti napaspas iti patarayna a raider ken sniper, ngem gapu ta awan iti silaw ti likudan ti kurong-kurong isu a natukbob daytoy ti sniper.
Gapu iti napigsa nga impact ti aksidente naipurwak dagiti pasaheros ti traysikel ken dagiti dua a drayber, idinto nga iti sumarsaruno a raider ket nadungparna dagiti naipurwak iti kalsada.
Segun kadagiti nakasaksi ti pasamak, dagiti dua a motorsiklo ket agkinkinnarera a rason a saanda a napansin ti lugan a kurong-kurong nga adda iti unaan.
Gapu ti aksidente, ti pasaheros nga adda iti likudan ti drayber ti kurong kurong ket nagsagaba ti serious head injury a rason ti nakatayanna, idinto dagiti dadduma a nakalugan ket nagsagaba ti serious injury ken madama a matamtaming iti ospital.
Dagiti met drayber ti motorsiklo ket nagsagaba met laeng iti nakaro a dunor, ngem naiyakar ti drayber ti raider idiay Norte ta nagsagaba ti fractured.
