VIGAN CITY – Nainget iti pannakikin-kinnammayet ti provincial quarantine office ti Ilocos Sur kadagiti otoridad idiay Abra tapnu maduktalan nu siasino iti akin-kukua dagiti sumurok-kumurang a maysa a tonelada a karne ti baboy a naikabil iti uneg ti drum a nailugan ti maysa a puraw a van a nasalamaan dagiti kameng ti provincial quarantine office idiay Bio, Tagudin.
Segun ken ni Provincial Quarantine Officer Martel Quitoriano, maipan kuma idiay Abra dagiti nasao a karne a nasalamaan da a kas inpakaammo kadakuada iti nagmaneho ti nasao a van.
Dagiti nasao a karne ket naggapu idiay Bulacan nga isu iti nagrairaan ti African Swine Fever virus isu’t gapu na a pina-isprayan ni Quitoriano ti danum nga adda agas na tapnu matay dagiti posible a virus a kimpet nangruna ket saan a nasayaat iti pannakaidalimanek na.
Mainaig dayta, kiniddaw ti opisyal kadagiti maseknan nga opisyal idiay probinsiya ti La Union ken Pangasinan a paingeten da iti quarantine checkpoint kadagiti lugar a masakupan da tapnu saan a makalibas dagiti plano na iti agiserrek kadagiti maiparit a produkto.
