VIGAN CITY- Dead on arrival iti ospital ni Marvin Javillonar nga agtawen iti dua pulo, baro ken agnaed idiay Barangay Villa Garcia, Sta. Cruz ta nalmes idiay Pinsal Falls, Baballasioan, Sta. Maria idi kalman, March 17, alas dos kwarenta y singko ti malem.
Segun ken ni Police Senior Inspector Arcadio Viloria, hepe ti Sta. Maria municipal police station, napan nagpipicnic idiay Pinsal Falls ti biktima ken dagiti gagayyem na, ket idi napan da nagdigos iti mismo a pagdissooran ti danum nga aggapu ti ngato, bigla lattan a nagpukaw ket saanen a nakalung-aw ti biktima iti danum isu a nagpatulong dagiti gagayyem na kadagiti opisyal ti barangay ken rescuers nga adda iti lugar.
Binatok dagiti rescuers iti mapapati a limnedan ti biktima ket idi nasarakan dan, pinakatan da ti first aid sa da intaray iti ospital ngem naideklerar a dead on arrival ta posible nga adu ti danum a nainom ti biktima.
Saan a naginom ti biktima ken dagiti gagayyem na sakbay da a nagdidigos ngem posible a napan iti nauneg a paset ti Pinsal Falls ti biktima isu a nalmes.
