VIGAN CITY – Maysa nga agtawen-iti-sangapulo ket siam a babai, nakemmeg gapu ti panangusarna iti peke a kuarta a pinaggatang
Nakemmeg iti ili ti Sta. Maria ni Ann Lopez, agtawen iti sangapulo ket siam, taga-Balite, Calumpit, Bulacan gapu ti pinaggatangna a peke a kuarta iti tiendaan ti Sta. Maria.
Gimmatang ti suspek iti karne ti baboy iti gatad a sangagasut a pisos manipud iti biktima a ni Madelin Realizo, agtawen iti limapulo ket walo, taga-Barangay Suso babaen ti peke a sangaribo a pisos nga inaramatna.
Sinuklian met ti biktima ti suspek iti siam a gasut a pisos agingga idi naamirisna a peke ti kuarta a naawatna ket nagpatulong kadagiti padana nga aglaklako.
Natakuatan dagiti otoridad a ti wallet ti suspek ket adda linaonna pay nga innem a piraso ti peke a sangaribo a peso bill, maysa a sangagasot a pisos, tallo a piraso a twenty peso bill ken maysa a five peso coin.
Iti agdama, kitkitaenen ti otridad dagiti CCTV footages iti paset ti tiendaan para iti posible a panangkita ken panangbigbig iti kadua ti suspek.
Nakikammayetda metten kadagiti kabangibang nga istasyon para iti dragnet operation kalpasan a mapapati a naglibas dagiti kadua ti suspek.
