Natalgeden ti kasasaad ti ubing nga agtawen iti walo a dandani nalmes idiay Amburayan River, Barangay Danac, Sugpon, Ilocos Sur.
Ti natay nga agtawen iti innem ket agnaed idiay Buguias, Benguet idinto a ti agtawen iti walo ket taga-Sudipen, La Union
Iti pannaki-uman ti Bombo Radyo Vigan ken ni PLT. Juliet Apusen, napan nakiboda dagiti ubbing kadua ti pamiliada ket sakbay nga agawidda, urayenda koma a maburak ti rama ti kabagyanda isu nga addada iti karayan.
Aglablaba ti ina ti natay idinto a napan nagdidigos dagiti ubbing iti kaadayo a sangagasut a metro ket kalpasan laeng ti sumagmamano a minutos, isun ti pannakakitana ti anakna a tumtumpaw iti karayan.
Insigidana a tinurong tapno koma isalakan ngem nalmesen ti biktima iti dayta a gundaway idinto a ti maysa nga ubing ket insalakan ti amana.
Nupay kasta, nagpalagip ni Apusen a nasken ti panagannad no mapan agdigos iti karayan ken nasken nga adda latta kadua dagiti ubbing.
Kunana pay a liklikan ti uminom no mapan agdigos kadagiti karayan wenno kabaybayan.
