Umuna iti listaan a matamtamaan iti HIV wenno Human Immunodeficiency Virus iti pagilian dagiti agtawen iti duapulo ket lima agingga agtawen iti tallopulo ket uppat kas kinuna ti Department of Health (DOH).
Segun ken ni DOH Spokesperson Assistant Secretary Albert Domingo, dayta ket nagtaud idi 2006 kumparar idi 2002-2005 nga ad-adu iti naaddaan ti HIV kadagiti agtawen iti tallopulo ket lima agingga uppat a pulo ket siam.
Iti napalabas a maysa a dekada, kinuna ni Dr. Domingo a nagsurok iti doble ti kaso iti pagilian.
Manipod iti duapulo ket maysa a kaso kada aldaw idi 2014, umaboten iti uppat a pulo ket walo idi 2024 a nangat-ngato ngem iti limapulo ket innem kada aldaw manipod Enero agingga Abril ita a tawen.
Ti kangrunaan a rason iti panagwaras iti sakit ket ti sexual contact kas kinuna ni Domingo.
Innayonna a ti rason ti transmission wenno panagwaras ket ti pannakinaig ti lalaki iti padana a lalaki manipod 2007.
