Nagpanawagan ti AGRI Party-list ti dagus a panagbalin a linteg ti singasing a mapalawa iti sakup ti crop insurance gapu dagiti agsasaruno a kalamidad a napasaran ti pagilian.
Gagem ti singasing a masalakniban ti panagbiag dagiti mannalon a masansan a maapektaran ti apitda gapu iti bagyo ken dadduma pay a didigra.
Ti House Bill No. 7387 a mangikagkagumaan a mapalawa iti serbisio ti Philippine Crop Insurance Corporation (PCIC) ken maallukoy iti pannakipaset ti pribado a sektor iti agricultural insurance, ket inaprobaran ti Kamara idi Marso 2023.
Patien ti AGRI a nasken ti crop insurance para iti food security.
Maallukoy pay ti PCIC a papigsaen ti kampania para iti pannakaipalista dagiti mannalon iti crop insurance ken ad-adda nga aktibo iti panangted kadagiti mannalon, kas iti panangideploy kadagiti mobile office kadagiti lugar a nakaro a naapektaran iti bagyo.
