Nakemmeg dagiti aglive-in partner iti buy-bust operation idiay Brgy. Vacunero, Sto. Domingo, Ilocos Sur.
Ti lalaki ket agtawen iti tallopulo ket tallo, tattoo artist idinto a ti babai ket agtawen iti tallopulo ket tallo, agpada nga agnaed Brgy. Poblacion, Sto. Domingo.
Iti pannaki-uman ti Bombo Radyo Vigan ken ni PLt. Roger Retreta iti Sto. Domingo Municipal Police Station, ti lalaki ket datin a drug surrenderee ngem daytoy iti umuna a gundaway a mapilaanda iti kaso.
Babaen ti naisayangkat a buy-bust operation nga idauluan ti Sto. Domingo ket naaktuan dagiti suspek nga aglaklako ti ilegal a droga.
Immunan a pinaglibakan dagiti dua iti nagilakoda ti droga ngem immaminda met laeng, ngem saanda a binigbig no siasinno ti paggapgapuan ti supplyda.
Naala manipod kadagiti suspek ti drug evidence a nasurok-kumurang 1.64 a gramo ti mapapati a shabu nga aggatad P11,152 a nakaipan iti tallo a heat sealed transparent plastic sachets, pakairamanan ti drug evidence kas buy-bust money P1,000, maysa a lighter, selpon, ken belt bag a dark green.
