Naliklikan dagiti agina idiay Barangay Daclapan, Cabugao, Ilocos Sur iti dandanida a pannakabiktima iti SMS phishing wenno text scam ket nalapdan ti panangipatulodda iti kuarta iti scammer.
Segun iti biktima a ni Lorehlie Aganad Sebastian, adda nangitawag kadakuada iti anakna a nadisgrasya ti maysa pay nga anakna idiay Manila ken adda doktor a nagpammarang a kasapulanna iti maidalan iti CT scan isu a masapulda ti agipatulod iti kuarta.
Gapu iti danagda ket kunana a sisasaganada a mangipatulod latta iti kuarta a mapatta-patta nga umabot iti P50,000 tapno laeng agbiag ti anakna nga imbaga ti scammer a 50-50.
Saan metten a nagbalaw ti anak a biktima idi tawagan isuna ti scammer ta kunana a katimtimek daytoy ti kabsatna.
Nupay kasta, tinawaganda met dagiti kaam-ammoda pay idiay Manila ket natakuatanda a saan met a nadisgrasya ti anak ni Sebastian ken adda met iti natalged a kasasaad isu a saandan a natuloy a nagipatulod iti kuarta.
Nagballaag ni Sebastian kadagiti kalugaranna nga agalibtakda kadagitoy a klase ti scammer ta kabaelanda payen iti mangtulad iti timek tapno laeng agkiddaw iti kuarta wenno mangbiktima iti sabali a tao.
