VIGAN CITY- Mai-inquest iti kaso kontra ken ni Jayson Cajindos nga agtawen iti tallo pulo ket pito, maysa a mangisursuro ken agnaed idiay Poblacion, San Vicente gapu ti mapapati a panangpaltog na kadagiti agassawa a da Fredelito Tolero Felismenia nga agtawen iti lima pulo ket uppat, naasawaan, maysa nga OFW kenni Fredelina nga agtawen iti lima pulo ket innem a taga-Turod, Cabugao idi alas otso kwarenta ti rabii idi March 10 idiay Sitio Callaguip, Baclig, Cabugao.
Segun ken ni Police Senior Inspector Ramil Llarenas, hepe ti Cabugao municipal police station, utang iti makitkita da a posible a rason iti nangpaltogan ti suspek kadagiti biktima ta sakbay iti pasamak ket nagtulag ni Fredelito nga agsarak da ken ni Cajindos iti maysa a convenient store idiay Cabugao ta aginnawat da iti bayad ti utang ti suspek.
Saan pay a masigurado nu ti suspek pay iti nagipatulod iti mapapati a pangta iti biyag dagiti agassawa ngem isunto ti palutputen dagiti otoridad ken ni Fredelina.
Nagsagaba iti saan unay a nakarao a tama iti paltog dagiti biktima ta ni Fredelito ket nadaplisan laeng iti bala ti akin-kannigid a sikigan na ken natamaan ti akin-kannawan a tangan ti ima idinto a ni Fredelina ket natamaan iti boksit na ngem naoperaanen iti rabii.
