Desidido nga agipila dagiti agassawa iti kaso kontra kadagiti agkabsat a kabagyanda a nangpangta kadakuada idiay Sitio Dagman, Poblacion, Quirino.
Nabigbig dagiti biktima ket da Sherwin Lausan Cortado, agtawen iti tallopulo ket uppat, ken ti asawana a ni Marie Mar Veloria Cortado, agtawen iti tallopulo ket innem, agpada nga agnaed iti nasao a lugar.
Dagiti met suspek ket da Kevin Jun Bodud Abawag, agtawen iti duapulo ket uppat, ken Rowel Bodud Abawag, agtawen iti duapulo ket innem nga agpada met laeng nga agnaed iti nasao a lugar.
Iti pannaki-uman ti Bombo Radyo Vigan ken ni PLT. Johnny Alibin, mapapati nga adda daan a parikut dagiti biktima ken suspek mainaig iti daga.
Idi alas dies iti rabii idi June 18, 2025 ket nakariing dagiti biktima gapu iti panaglaaw-laaw dagiti nakainom a suspek a nangpwersa a mangiduron iti arwangan ti pagtaengan dagiti biktima tapno makastrekda.
Kalpasanna, pinaturongan ni Abawag iti kutsilyo ni Sherwin sa pinangtaanna a patayenna, ken dinurogan met ti maysa pay a suspek nga ituloydan a patayen.
Naanawa met laeng dagiti suspek babaen kadagiti barkadada, ngem nupay kasta ket sumangoda iti kaso a Grave Threat ken Tresspass to Dwelling.
Nupay kasta, awan ti nadangran iti napasamak.
