VIGAN CITY – Maysa a pammaltog ti napasamak idiay Mabilbila Sur, Santa a ti biktima ket ti agassawa a da Reynald Cardenas, agtawen iti tallopulo ket pito ken ni Jessica, agtawen iti tallopulo ket uppat nga agpada nga agnaed iti nasao a lugar.
Maibasar iti pakpakauna nga imbestigasyon, agaw-awid dagiti biktima a naggapu iti pagtaengan ni Melchor Belano a kasinsin ni Reynald idin ta maysa a lalaki ti bigla a nangpaltog kenkuana babaen ti saan pay nabigbig a kalibre ti paltog.
Dunor iti akin-kannawan a luppo ti sinagrap ti lalaki a biktima idinto a ti asawana ket nagsagaba iti dunor ti akin-kannigid a tanganna, nga agpada a naipaagas iti ospital para ti pannakatamingda.
Sigun kadagiti nakaimatang iti pasamak, ti suspek ket nakasuot iti blue jacket a nakahelmet, ket insigida a naglibas babaen ti motorsiklo nga inaramatna.
Naiwayat ti dragnet operation para ti pannakatiliw ti suspek idinto a nakikammayeten dagiti kameng ti Bantay Police Station iti ili ti Narvacan, Sta. Maria, Burgos ken Nagbukel.
