Inamin ni AGAP Party-list Rep. Nicanor Briones nga isuna ti adda ti viral a ladawan ken video a nakita nga agbuybuya ti online sabong bayat ti session-na iti Kamara idi Lunes.
Inlawlawag ni Briones a saan nga E-sabong ti buybuyaenna nu diketdi link nga impatulod ti kaanakanna ket idi linukatanna ket video gayam ti sabong.
Impaganetgetna nga uray ti maminsan ket saanna a pinadas ti simrek ti sabongan, saanna nga ammo ti online gaming ken awan ti gcash wenno money transfer a kasapulanna tapno agay-ayam ti sugal iti online.
Kinunana a nadalus ti konsensyana ken nakasagana a sumango iti Ethics Committee nu adda ti agipila ti reklamo kontra kenkuana.
Nadismaya pay ni Briones iti nangala ti ladawan wenno video ta malaksid a linabsingna ti privacy-na ket saanna man laeng a sinaludsod nu E-sabong ti buybuyaenna.
Kabayatanna, awan ti plano ni Briones a kasoan ti nagala ti ladawan ken video ngem nagkiddaw ti pammakawan ta nadadael ti reputasyonna ken uray ti House of Representatives kas institusyon.
