Imbutaktak ni Office of the Vice President (OVP) special disbursing officer Gina Acosta iti Senate Impeachment Court a ni Vice President Sara Duterte ti mapapati a nangbilin kenkuana nga ited ken ni Col. Raymund Dante Lachica ti P125 million a confidential fund nga in-withdraw-na ken in-encash-na iti bangko.
Iti agtultuloy nga impeachment trial ni Duterte, sinaludsod ni Private Prosecutor Atty. Amando Ligutan ni Acosta no siasino ti head of agency ti nagbilin kenkuana nga ited ti P125 million casg ken ni Lachica, dati a mangidaulo ti Vice Presidential Security and Protection Group.
Segun ken ni Ligutan, ti nangbilin kenkuana nga iruar ti kuarta a P125 million iti security officer a ni Col. Lachica ket ni Duterte.
Kinumpirmaran pay ni Acosta a napasamak iti panag-withdraw ti buo a P125 million iti Land Bank of the Philippines idi December 20, 2022 ken nakaipan iti uppat nga atiddog a travel bag.
Immunan a naireport a nairuar ti OVP ti P125 million a sag-P1 million bundle ken naideklarar a nagastos iti uneg laeng iti sangapulo ket maysa, manipod December 21 agingga 31, 2022, karaman iti panawen ti paskua.
Nairuar ti pondo iti baet ti nakalanad iti COA-DBM-DILG-GCG-DND Joint Circular No. 2015-01, ti cash advance para iti confidential funds ket rumbeng a personal nga alaen, gastoen ken i-account ti opisial a naidatag ken bonded nga Special Disbursing Officer wenno SDO.
Insaludsod pay ni Presiding Officer Francis “Chiz” Escudero ken ni Acosta no paset ti Joint Circular ti trabaho ti security officer ti umawat ken mangipatungpal ti confidential fund ket kinunana a ni Lachica iti makaammo ta isuna ti eksperto iti pannakaipatungpal ti confidential operation ken activities ta isuna ti adda access-na no maipanggep ti national security.
