Nangipatulod ti Abra Provincial Hospital iti summons kontra iti drayber ti ambulansia a naalaan iti video gapu ta mapapati nga agmanmaneho a reckless.
Iti pannaki-uman ti Bombo Radyo Vigan ken ni Chief of Hospital Dr. Rosauro Vincent Seares, napaayaban ti nasao a drayber tapno agpalawag mainaig iti insidente ken maamuan no ania met ti kalinteganna.
Inlawlawag ti opisial nga awan ti pasyenten ti ambulansia idi mapasamak ti insidente, ta kagapgapuna idiay Batac a nangiyakar iti serious patient ngem adda manen ti baro a serious patient nga agur-uray iti ospital a kasapulan a mayakar idiay Baguio, isu a nagdardaras ti drayber a makasubli.
Impaganetget ti opisial a kinuna ti drayber a naannad met isuna iti panagmaneho uray no agdardaras.
Nupay kasta, nagpalagip latta ti ospital kadagiti drayber ti ambulansia nga agannad a kanayon iti panagdalyasatda iti kalsada tapno saanda a makadisgrasia kadagiti dadduma pay a motorista.
Agtultuloy met nga agimbestigar ti ospital mainaig ti insidente ta no mapaneknekan nga adda paglabsingan ti drayber ket sangwenna ti pannusa a maipataw kenkuana.
