
Nagpalagip ti Department of Education (DepEd) Vigan City Divison kadagiti school personnel ken school head a kasapulanda pay ti mangala iti pammalubos wenno clearance manipud iti maseknan a higher office wenno sakbay a sumungbat kadagiti interview ti media wenno mangted impormasion mainaig kadagiti isyuti pagadalan.
Daytoy ket kas maisurot iti baro a Media Guidelines nga inruar ti DepEd iti salinong ti DepEd Order No. 7, Series of 2026.
Segun ken ni Division Information Officer Cherry Discaya, saan a basta-basta a mabalin nga agsao iti media dagiti school personnel ken school heads nga awan ti pammalubos manipud iti nangatngato nga opisina.
Gagemna daytoy a masigurado ti kinapudno ken kinahusto dagiti impormasion a maibingay iti publiko, kangrunaan dagiti isyu mainaig kadagiti saan pay naberipika nga impormasion.
Nupay kasta, inallukoy ni Discaya ti publiko a direkta nga idanon iti opisinada ti aniaman a saludsod, reklamo wenno pakaseknanda mainaig kadagiti pagadalan.
Maipalagip nga idi kallabes ket adda dagiti sumagmamano a nagannak nga agrekreklamo gapu kadagiti nangina a mabayadan iti pagadalan a sumsumrekan dagiti annakda.










