Kinumpirmaran ni Department of Migrant Workers (DMW) Secretary Hans Leo Cacdac a natalged amin dagiti 17 a Filipino seafarers a naglugan iti tanker nga Atlantic Asphalt a nairaman iti panagdinnungpar iti Mississippi River iti asideg ti New Orleans, Louisiana, United States.
Segun ken ni Cacdac, nakadinnungpar ti tanker ti passenger river boat ngem awan ti naipadamag a nadangran kadagiti 17 a Filipino crew members.
Innayonna pay a makikoordinar ti DMW iti Philippine Embassy sadiay Washington, D.C., Philippine Consulate sadiay Houston ken dadduma pay a maseknan nga ahensia tapno masigurado ti kinatalged dagiti marino.
Impasigurado pay ni Cacdac nga ipaay ti gobierno ti kasapulan a tulong ken siguraduenna ti natalged a pannakaisubli dagiti 17 a Filipino crew members iti direktiba ni Presidente Ferdinand Marcos, Jr.
