Agsubli ditoy Pilipinas ni dati a United Nations Special Rapporteur on Extrajudicial Killings and Amnesty International Secretary-General Agnès Callamard tapno makisinnarak kadagiti pamilia dagiti biktima ti kampania ni dati a Presidente Rodrigo Duterte kontra droga.
Sumangpet ni Callamard ditoy pagilian manipud Nobiembre 19 agingga 22, nga isu ti umuna a panagbisita na sipud idi 2017 kalpasan a naikkat ti immigration ban kontra kenkuana idi Setiembre.
Malaksid kadagiti pamilia dagiti biktima ken nakalasat iti drug war, makisinnarak pay kadagiti abogado a kritiko ti kampania ken dagiti periodista a nangipadamag ken nangimbestigar iti nasao a kaso.
Segun ken ni Callamard, naintiempuan ti panagsublina gapu ta naituding a maipasango manen ti trial ni Duterte idiay The Hague mainaig iti kaso a crimes against humanity and murder.
