Maysa a balligi a napno ti emosion ken ragsak ti marikrikna ni Melanie Matnog kalpasan a magun-od na ti maika-siam a puwesto iti Midwifery Licensure Examination.
Iti pannakiuman ti Bombo Radyo Vigan ken ni Matnog, kinuna nga iti baet ti rigat ken sakripisio a nalasatanna, saan pay laeng a mamati a karaman isuna kadagiti topnotcher.
Saan a nadaras ti pannakagun-od ni Melanie ti balligi gapu ta nangrugi pay laeng isuna a nag-review idi napan a tawen, pakairaman ti online review tapno mapalawa pay ti ammo na ken maisagana ti bagina iti examination.
Segun ken ni Matnog, iti likudan ti pannakagun-od na ti Top 9 ket dagiti panawen a napno ti adal, puyat, bannog ken nadumaduma karit, nga itan ket makita nan ti nagbannogan-na.
Pagyamanan na dagiti amin a timmulong iti pannakagun-od na iti daytoy a balligi kangrunaan ti pamilian.
