Saan a nagbalin a lapped iti maysa a bulag a lalaki ti rangkapna tapno makadonar iti dara ken makatulong iti panangisalakan iti sabali babaen iti naisayangkat a Dugong Bombo Blood Letting Activity ita nga aldaw idiay Provincial Farmers Livelihood and Development Center iti Vigan City, Ilocos Sur.
Segun ken ni Christopher Singson a maysa kadagiti successful blood donor, nalaus ti ragsak ken panagyamanna ta uray no adda rangkapna ket kabaelan pay laeng ti bagina ti mangipaay iti dara ken makatulong iti sabali.
Nangrugi ti kalikagumna a makatulong gapu iti personal a kapadasanna idi maaksidente ken nagkasapulan iti dara.
Kunana a napadasanna ti marigatan nga agsapul iti blood donor isu nga inkarina iti bagina a no maikkan la ket ti gundaway ket aramidenna amin tapno saan a mapadasan ti sabali ti rigatna nga agsapul iti dara.
Gapu dayta, agtultuloy ti panagidonarna iti dara kas wagas iti panangtulongna ken panangtedna iti inspirasion iti sabali.
Walo a darasen a nagidonar, ngem saan a mauma gapu iti kalikagumna a makatulong ken makaisalakan iti biag.
