Agtultuloy ti pannakikammayet ti Philippine National Police (PNP) kadagiti gangannaet a pannakabagi ti linteg tapno mailasin ken maisalakan ti Mapattapatta a 900 agingga iti 1,500 a Pilipino a maipagarup a naibalud kadagiti scam hub iti Myanmar.
Segun ken ni PNP Chief Gen. Jose Melencio Nartatez Jr., agtultuloy ti imbestigasion ken verification dagiti report babaen ti pannakitinnulong kadagiti dadduma nga ahensia ti gobierno.
Segun iti dati nga opisial ti PAOCC a ni Winston Casio, mapapati a nasapsaplit ti sumagmamano a Pilipino kalpasan a ginandatda ti aglibas ken nakiddaw pay dagiti nangibalod kadakuada iti ransom kasukat ti pannaka-wayawayada.
Inallukoy ni Casio iti gobierno a pagsaritaanda ti isyu iti masungad nga ASEAN Summit ken mangbukel iti special task force para iti pannaka ispal ken pannakayawid dagiti biktima ditoy pagilian.
