Pinasingkedan ni House prosecution spokesperson Lanao del Sur Representative Zia Alonto Adiong a mabalin a dakdakkel ngem P870 million ti saan a mailawlawag a pondo ni Bise Presidente Sara Duterte, nangruna no malukatan manen ti isyu dagiti maipagarup a dollar accounts-na.
Segun kenni Adiong, likliklikan ti depensa ti panagsasarita kadagiti nadakamat nga account kalpasan a saanda a direkta a nasungbatan dagiti napateg a saludsod kabayatan ti cross-examination ti prosekusion kadagiti immun-una a saksi.
Kinuna pay ni Adiong a ti panangliklik iti testimonia ti opisial ti Bank of the Philippine Islands (BPI) ket mabalin a paset ti estratehia ti depensa gapu ta mabalin a mapaneknekan a saan laeng a P870 milion no saan ketdi posibe a dakdakkel a gatad, pakairamanan ti pondo iti doliar, ti kasapulan a mailawlawag.
Innayonna nga imbes a kimmapuy ti kaso, ad-adda a pinatibker ti testimonia ti sumagmamano a saksi ti alegasion kontra ken ni Duterte, partikular iti isyu ti assets, interes iti negosio, ken pinansial a transaksionna.
