Dinepensaan ni defense counsel Michael Poa ni Davao City accountant Vingelin Bajan mainaig iti pannakaupay dagiti senador-judges gapu iti masansan a sungbatana nga awan ammona bayat ti impeachment trial idi Nobiembre 10, 2026.
Segun ken ni Poa, rumbeng a mailaksid dagiti saksi no talaga nga awan ti ammoda wenno saanda a malagip gapu iti panaglabas ti panawen.
Kinuna ni Poa a nupay kayatda a direkta ken nalawag ti sungbat dagiti saksida, saan met a nainsiriban nga agaramidda laeng iti estoria no talaga a saanda malagip dagiti pasamak.
Karaman kadagiti saan a malagip ni Bajan ti panagbalinna a partner iti accounting firm nga Ampil, Elises, Ciudadano & Co., panagpirmana iti Articles of Partnership idi 2003, ken ti P1,000 a capital contribution-na.
Segun kenkuana, saan a malagip ni Bajan a pimmanaw iti partnership idi 2015, nakaawat iti allowance wenno kompensasion, ken nagpirma iti sumagmamano a dokumento a mainaig iti dati a trabahona.
