Sinaludsod ni House private prosecutor Atty. Lorna Kapunan ti panagibaga ni Suzette Balucanag-Punay nga adda personal a pannakaammona iti prangkisa ti Jollibee iti Siudad ti Davao maibasar kadagiti dokumento.
Segun kenni Kapunan, hearsay wenno parparbo ti statement ti testigo gapu ta immunan nga inadmitirna a saanna nga am-ammo ni Vice President Sara Duterte.
Impaganetget ni Kapunan nga awan ti umdas a pangibasaran a mangibaga nga adda personal a pannakaammo ti saksi maipapan iti pannakayakar ti shareholdings ti bise presidente manipud iti maysa a kompania agingga iti sabali.
Impapilitna pay a saan a mabalin nga ipapan ti saksi ti impormasion nga awan kadagiti dokumento a naiparang kas ebidensia ti depensa.
Innayon ni Kapunan a saan a maitunos iti immun-una a kinunana ni Balucanag-Punay a saanna am-ammo ti bise presidente, nga idi agangay ket imbagana met laeng a pamiliar isuna.
Segun ken ni Kapunan, mabalin a pamiliar ti testigo kadagiti Jollibee franchises iti Davao City gapu ta personal a napan sadiay ken mabalin a nangan kadagiti kastoy nga establisimiento.
