Saanen nga agipila ti kaso iti pamilia ti lakay a pimmusay kalpasan a nadungpar ti ambulansia idiaydiversion road Barangay Arnap, San Ildefonso, Ilocos Sur.
Ti nagbisikleta ket agtawen iti pitopulo ket maysa, residente ti Barangay Iboy, iti nadakamat nga ili, idinto a ti ambulansia ket minaneho ti agtawen iti limapulo ket uppat, residente ti Barangay Baliw Laud, ili ti Sta. Maria.
Iti pannakiuamn ti Bombo Radyo Vigan kenni PCPT Joseph Fieldad ti San Ildefonso Municipal Police Station, pinasingkedanna a saanen nga agipila ti pamilia ti lakay gapu ta maamiris da met nga aksidente ti napasamak.
Segun kenni Fieldad, nagkiddaw laengen ti pamilia ti senior citizen iti pamilia ti nagmaneho ti ambulansia ti tulong pinansial ken dadduma pay a kasapulan iti pannakaidulin ti bangkay ti lakay.
Maipalagip nga agpapa-amianan ti nagbisikleta ket idi madanon na ti intersection, bimmallasiw daytoy iti kalsada rason ti pannakadungpar ti ambulansia nga agpa-abagatan a direksion.
Gapu dayta, naawanan ti puot ti lakay ket dagus a naipan iti balay pagagasan ngem pimmusay bayat a matamtaming, idinto a saan a naan-ano ti nagmaneho ti ambulansia.
Innayon ni Fieldad a kinumpirmaran ti doktor a nangtaming iti biktima a nagsagaba daytoy ti traumatic brain injury.
