Impasigurado ni Palace Press Officer Undersecretary Claire Castro a ti panangidaulo ti pagilian iti Association of Southeast Asian Nations (ASEAN) Summit ket manglukat iti adu a gundaway para kadagiti Pilipino.
Segun ken ni Castro, manamnama a magunggonaan dagiti negosiante ken lokal nga entrepreneurs iti pannakaangay ti panagtitipon gapu iti panagsaknap dagiti gundaway iti panagtagilako.
Manamnama met ti iyaadu ti investment ken ad-adu pay a panglukat a pagtrabahuan para kadagiti Pilipino iti isasangpet dagiti lider ken pannakabagi manipud iti nadumaduma a pagilian.
Impaganetget pay ni Castro ti kinapateg ti summit iti pannakataginayon ti nasayaat a suplay ti taraon ken enerhia iti pagilian.
Innayonna a ti panagtitipon ket gundaway tapno maipakita iti lubong ti kinamanagpadagus, kinagaget ken pannakaseknan dagiti Pilipino.
