Inallukoy ni Bise Presidente Sara Duterte iti gobierno a siguraduen ti umdas a suplay ti taraon iti pagilian kas panagsagana iti posible a nakaro nga epekto ti Very Strong El Niño wenno Super El Niño iti agrikultura.
Iti pannakitaripnong ni Duterte kadagiti OFWs idiay Hong Kong, impaganetget ni Duterte a saan nga umdas ti Panagurnong iti danum ti tudo gapu ta masapul met nga agsagana iti posible a pannakadadael dagiti apit ken kinakurang ti suplay ti taraon a mabalin nga agresulta iti panag kasapulan iti panagangkat.
Ti palawag ti Bise Presidente ket sumaruno iti panawagan ni Presidente Ferdinand Marcos Jr. iti publiko nga agkolekta iti danum ti tudo kas panagsagana iti posible a kinakurang ti suplay iti danum.
Kabayatanna, pinasingkedan ti PAGASA nga addan ti Very Strong El Niño iti Tropical Pacific ken manamnama nga agtultuloy agingga iti umuna a kagudua ti 2027, iti kasta, mapapigsa dagiti wagas ti panaginut iti danum ken agsagana para iti posible a tikag.
