Isingsingasing ni Senadora Loren Legarda ti panagngato ti minimum night differential manipud 10 a porsiento a mapan iti 20 a porsiento para kadagiti mangmangged a sakop ti linteg iti pribado a sektor.
Daytoy ket kalpasan a nagtalinaed a saan a nagbaliw ti naikeddeng a nayon a sweldo iti uneg ti nasurok sangapulo a tawen iti baet ti panagngato ti presio dagiti magatang ken dagiti pangta iti salun-at a katukad ti panagtrabaho iti rabii.
Iti gakat a Senate Bill No. 2585, kayat nga amyendaran ti senadora ti Article 86 ti Labor Code tapno aramiden a saan a nababbaba iti 20% ti regular a sweldo ti nayon a bayad iti tunggal oras ti panagtrabaho manipud alas-10 ti rabii agingga alas-6 ti bigat.
Agtalinaed met a protektado ti nangatngato a night shift differential a maaw-awat ti sumagmamano a mangmangged iti salinong ti collective bargaining agreements, employment contracts, dagiti pagannurotan wenno kadawyan a sistema ti kompania, ken dadduma pay a legal a katulagan.
