Umabot iti 19, 869 a pulis ti maideploy tapno siguradoen ti seguridad kadagiti venue, hotel ken ruta iti maika-49 nga ASEAN Summit a mapasamak manipud Nobiembre 15 agingga 17, segun iti Philippine National Police (PNP).
Pinasingkedan ni PNP chief Gen. Jose Melencio Nartatez Jr., nga addan iti maudi a paset ti panagsagana ti kameng da para iti nasao a summit, a manamnama a dar-ayan ti nasurok 20 a lider ti nadumaduma a pagilian.
Pakairamanan daytoy ti panangsimpa ti deployment, panangpapigsa ti intelligence monitoring, panagsagana ti contingency plans ken pannakibinnulig iti Armed Forces of the Philippines, Presidential Security Command, dadduma pay nga ahensia ken dagiti lokal a gobierno.
Nabilin pay ti National Capital Region Police Office ken dadduma pay a maseknan a yunit a siguradoen a kumpleto ken beripikado ti plano da sakbay a sumangpet dagiti gangannaet a lider ken delegado.
