Inlawlawag ni Atty. Gerville Luistro a speculation wenno parparbo laeng ti report a 14 agingga 16 a senador ti nakasagana a bumutos a pabor iti pannakakombiktar ni Bise Presidente Sara Duterte iti impeachment trial.
Pinasingkedan ni Luistro nga awan ti sigurado a nadakamat a numero gapu ta saan pay a naisayangkat ti aktual a panagbutos iti Senado.
Impaganetget ti abogado a masapul nga umuna a denggen ken analisaren dagiti senador dagiti argumento ken ebidensia nga indatag ti agsumbangir a dasig sakbay a maikeddengda ti kaso.
Segun iti Konstitusion, kasapulan ti butos ti saan kumurang a dua a kakatlo kadagiti amin a kameng ti Senado tapno makombikto ti maysa nga opisial iti impeachment trial, isu a saan a masigurado ti pagbanagan maibasar laeng kadagiti agsirsirkulo a bilang.
