Itantandudo dagiti mammanday-linteg ti National Children’s Nutrition Act tapno mapalawa ti programa ti panagpakan wenno feeding program ken mataming ti parikut ti malnutrision kadagiti ubbing a Pilipino.
Ti gakat ket mangibilin iti Department of Social Welfare and Development (DSWD) ken lokal a gobierno a mangipaay iti supplemental feeding para kadagiti ubbing nga agtawen iti 2 agingga iti nababbaba ngem 5 a tawen bayat nga imanehar ti DepEd ti feeding program para kadagiti estudyante manipud Kindergarten agingga Grade 6.
Saklawen pay ti gakat dagiti masikog nga estudiante a maikkan iti nasustansia a taraon ken kanayonan a bitamina ken mineral tapno maipaay dagiti kasapulanda iti sustansia.
Kanayunan pay ti regular screening ti panagdakkel ken salun-at dagiti ubbing, micronutrient supplementation, milk program ken nutrition education tapno malapdan ti napaut nga epekto ti malnutrition.
