Pinaatiddog ti Land Transportation Franchising and Regulatory Board (LTFRB) ti deadline ti aplikasion para iti regularization dagiti ride-hailing service providers iti temporary wenno ‘tempo’ status iti kanayonan a 30 nga aldaw.
Imbilin ni Transportation Secretary Vince Dizon ti extension tapno maikkan ti ad-adu pay a Transportation Network Vehicle Service (TNVS) operators iti gundaway a mangkumpleto iti aplikasionda.
Nakaawat ti LTFRB iti 13,216 nga aplikasion a 5,091 kadagitoy ti naikkan iti provisional authority bayat a mapapartak ti pannakaproseso dagiti nabati.
Indagadag ni LTFRB Acting Chairman Greg Pua Jr. kadagiti aplikante a mangkumpleto ken mangipasa kadagiti kasapulan a dokumento iti online platform tapno maliklikan ti pannakaat-atiddog wenno pannakakansela ti aplikasionda.
