Impangato ti Department of Environment and Natural Resources (DENR) dagiti addangna kontra iti uram iti kabakiran wenno wildfire iti maximum alert status gapu iti nakaro a pudot ken namaga a kasasaad a gapuanan ti napigsa nga El Niño.
Ti ahensia ket nangideploy kadagiti kameng ti Bantay Gubat, nangisayangkat ti panagsanay para kadagiti opisial ken nangiwayat kadagiti fireline tapno malapdan ti panagwaras ti uram kadagiti kabakiran.
Ininget pay ti DENR ti pannakaiparit ti open burning ken kaingin bayat ti temporario a panagserra ti Mt. Apo Natural Park tapno malapdan ti uram gapu iti aktibidad ti tao.
Nangisayangkat met dagiti opisina ti DENR iti Ilocos, Bicol, Masbate, Davao, Zamboanga ken Cagayan de Oro iti fire prevention patrols, nangisagana kadagiti alikamen a panglaban iti uram.
