Ipatungpal manen ti Senate Impeachment Court ti Rule 18 wenno sub judice rule kadagiti amin nga uppat nga articles of impeachment kontra ken ni Vice President Sara Duterte, agraman dagiti tallo nga artikulo nga imbabawi ti prosekusion.
Iti pammilin ni Presiding Officer Francis “Chiz” Escudero, naparitan amin dagiti partido, senator-judges, prosekusyon ken depensa a mangiruar iti pampubliko nga statement mainaig iti merito dagiti kaso kabayatan nga agtultuloy ti trial.
Nagballaag pay ti korte a mapatawan iti naan-anay a pannusa ti asinoman nga aglabsing iti pammilin.
Naituding nga idatag ti depensa dagiti ebidensiada iti nabatbati nga Article II, a mangtratar iti mapapati a saan a mailawlawag a kinabaknang ti bise presidente, inton Nobyembre 9.
