Ngimmato ti inflation rate iti pagilian iti 7.8 porsiento ita nga Oktubre manipud iti 7.2 porsiento idi Setiembre, maibasar iti datos manipud iti Philippine Statistics Authority wenno PSA.
Daytoy ti maikadua nga agsasaruno a bulan a nakairekord iti panagngato ti implasion, a nakaigapuan ti promedio nga implasion a dimmanon iti 5.6 a porsiento manipud Enero agingga iti Oktubre, a nalab-awan ti target ti gobierno a 2 agingga iti 4 a porsiento.
Segun ken ni PSA Chief ken National Statistician Claire Dennis Mapa, ti transportasion ti kangrunaan a nangtignay iti panagngato ti implasion kalpasan a nakairekord iti 20.1 a porsiento nga implasion.
Karaman kadagiti rason ti panagngato ti plete ti dyip ken bus, ti presio ti gasolina ken LPG, kasta met ti singir ti kuryente. Nupay kasta, nagbannayat ti panagngato ti presio ti taraon iti pagilian.
