Impaganetget ti DOST-PHIVOLCS ti kinapateg ti panagsagana ken pannakaammo ti publiko no adda napigsa a ginggined wenno makunkuna a “The Big One” a dumteng iti pagilian, kagiddan ti pananglagip iti World Tsunami Awareness Day idi November 5.
Segun ken ni PHIVOLCS Director Teresito Bacolcol, nasken nga ammo ti publiko dagiti natural a pakdaar a pagilasinan ti tsunami, partikular ti napigsa ken nasurok a 20-second a panaggined , kellaat a panagatras ti danum ti baybay ken karkarna nga uni manipud iti taaw.
Maipalagip kadagiti umili aglalo kadagiti lugar iti igid ti baybay a dagus nga umakar iti nangatngato a lugar wenno iti naituding a sentro ti panagbakwit no madlaw dagiti nasao a senyales ken saan nga aguray iti opisial a pakdaar.
Kabayatanna, naituding a mangrugi ti modernisasion ti PHIVOLCS inton sumaruno a tawen, karaman ti pannaka inayon ti 161 a baro nga alikamen tapno mapapartak ti pannakaproseso ti datos ken pannakaipaulog dagiti pakdaar iti tsunami.
