Agsagsaganan ti Local Government Unit ti San Esteban, Ilocos Sur iti posible nga epekto ti Super El Niño babaen iti maysa nga ordinansa a mangidatag kadagiti programa ken tulong para kadagiti sektor a mabalin a maapektaran iti nakaro a tikag.
Naawagan a “Rayray San Esteban Kontra Super El Niño” ti ordinansa a manamnama a maaprubaran sakbay nga agtapos ti Nobiembre wenno agingga Disyembre.
Iti pannaki-uman ti Bombo Radyo Vigan ken ni Vice Mayor Ray Elaydo II, sagudayen ti ordinansa dagiti interbension ken tulong ti LGU para kadagiti posible a maapektaran a sektor kas kadagiti mannalon, mangngalap, TODA members, negosiante ken dagiti estudiante.
Karaman kadagiti plano a tulong ti fuel subsidy ken panangted kadagiti equipment a kasapulan iti sektor ti agrikultura.
Kayat pay ti LGU a maikkan iti water pump ti kada tobacco farmer ken maaddaan iti bukod a water reservoir ti kada pagtaengan.
Gagem ti ordinansa a masigurado nga adda nakasagana nga addang ken tulong ti ili inton dumteng ti nasao a weather phenomenon.
