Posible a malpas ita a bulan ti impeachment trial ni Vice President Sara Duterte no makumpleto ti defense panel ti presentasion da iti kaso iti uneg ti sangapulo a full trial days, segun ken ni lead House prosecutor ken Batangas 2nd District Rep. Gerville Luistro.
Pinasingkedan ti agpampanday linteg a namnamaen ti prosecution nga agkiddaw ti defense ti 10 a buo nga aldaw a trial tapno idatag dagiti ebidensia mainaig iti nabatbati nga impeachment article, isu ti alegasion ti unexplained wealth kontra ken ni Duterte.
Tallo iti uppat nga orihinal nga impeachment articles ti insanud ti prosecution, pakairamanan ti grave threats, maipagarup a misuse ti confidential funds ken bribery iti Department of Education.
Segun ken ni Luistro, datin a nagkiddaw ti defense ti 30 full trial days para iti uppat nga impeachment articles isu a mapatta-patta a mabalin laeng nga agkasapulan ti 10 nga aldaw para iti nabatbati nga article.
Nupay kasta, inlawlawag ti agpampanday linteg a mabalin latta nga umabot agingga Disiembre ti trial no agkasapulan ti naat-atiddog a panawen ti defense team.
