Impaganetget ti Malakanyang a saan a masayang ti pondo ti pagilian iti impeachment trial ni Vice President Sara Duterte no naipakita met iti publiko dagiti dokumento, datos ken ebidensia iti proseso.
Segun ken ni Palace Press Officer Undersecretary Claire Castro, naikkan gundaway ti prosekusion ken depensa nga ilanad ti biangda, agraman ti panang-cross examine kadagiti testigo.
Iti personal a panirigan ni Castro kas abogado, saanna a maibilang a mistrial ti impeachment trial ta naikkan ti naan-anay a gundaway ti depensa a manganag kadagiti ebidensia.
Inlawlawagna pay a ti pannakai-withdraw dagiti tallo nga articles of impeachment ket saan nga otomatiko a lapped iti sabali nga imbestigasion a mabalin nga isayangkat ti sabali nga ahensia no adda legal a pagibasaran.
