Nagballaag ti British Chamber of Commerce Philippines (BCCP) a posible pay a ngumina ti presio ti baboy iti merkado no ituloy ti gobierno ti plano a panangipangato iti taripa kadagiti imported pork products.
Segun ken ni BCCP Executive Vice Chairman Chris Nelson, mabalin a makaapektar iti presio ti karne ti gakat a mangipangato iti taripa iti imported pork iti 30 percent tapno makastrek iti minimum access volume ken 40 percent met para kadagiti lumabes iti daytoy, manipud iti agdama a 15 ken 25 percent.
Kwinestion ni Nelson ti plano ti Department of Agriculture a temporaryo nga isardeng iti uneg ti 60 nga aldaw ti panagangkat dagiti sumagmamano a pork products kas ti kasim, pigue ken liempo ta mabalin a mangpababa iti suplay ken mangpangina iti presio.
Impaganetget ti BCCP a mapagtalinaed pay laeng ti agdama a taripa agingga a saan pay a kabaelan a solusyonan ti lokal a produksion ti pagkasapulan iti baboy ti pagilian.
