Nagpanawagan ti Philippine Animal Welfare Society (PAWS) iti nationwide investigation kadagiti pet crematorium iti pagilian kasaruno ti kontrobersia iti mapapati a saan a husto a panangibelleng kadagiti bangkay dagiti aso ken pusa imbes nga idalan iti cremation.
Inallukoy ti grupo ti Department of the Interior and Local Government, Department of Health, Department of Environment and Natural Resources, Bureau of Animal Industry, Departmentof Trade and Industry, Philippine National Police ken National Bureau of Investigation nga imbestigaran ti posible a panaglabsing kadagiti regulasion ken paglintegan mainaig iti negosio, sanitation, aglawlaw ken karbengan dagiti aggatang.
Agsapsapulen ti PAWS kadagiti dokumento ken ladawan kas ebidensia para iti pannakaisagana dagiti kaso kontra iti akinkukua iti pet crematorium a mapapati a karaman iti insidente.
Nangidiaya pay ti grupo iti libre a legal assistance kadagiti apektado a pet owner a kayatna ti mangipila iti reklamo, kaduada ti Luna and Furry Siblings ken Philippine Animal Rescue Team.
