Dinayaw ti National Congress of Unions in the Sugar Industry of the Philippines (Nacusip) ni Negros Occidental Gov. Eugenio Jose Lacson iti naballigi a cloud seeding operations a nangipaay iti tulong kadagiti talon a naapektaran iti tikag iti probinsia.
Iti 28 nga aldaw, naisayangkat ti operasion ti 38 sorties nga agdagup iti 52 nga oras ti flight time ken nausar ti 456 sako nga asin kas seeding agent babaen ti tulong ti gobierno probinsial, Department of Agriculture, Bureau of Soils and Water Management ken Philippine Air Force.
Indagadag ti grupo iti Sugar Regulatory Administration (SRA) nga isardengda ti panag-hire kadagiti pribado nga eroplano para iti naituding a P30-M cloud seeding project kontra iti epekto ti Super El Niño ket imbes ketdi usarenda dagiti alikamen ken serbisio ti gobierno.
Segun kenni Nacusip National President Roland de la Cruz, nasken a mapan ti pondo iti aktual nga operasion kas iti panaggatang ti asin ken gasolina, nangruna ta dimmanon iti P41.98-M ti pannakadadael dagiti apit iti Negros Occidental.
