Nagsagaba iti dunor dagiti agnobio a biktima iti pammagkong kadakuada dagiti dua a lalaki nga agkabsat idiay idiay Barangay San Nicolas, Candon City, Ilocos Sur.
Dagiti biktima ket pakairamanan ti maysa a babai nga agtawen iti duapulo ket uppat ken lalaki nga agtawen iti duapulo ket innem, agnaed iti Barangay Calaoa-an, Candon City.
Dagiti met suspek ket agpada nga agnaed iti Barangay Bagani Campo iti nasao a siudad.
Iti pannaki-uman ti Bombo Radyo Vigan ken ni PLT. Jovelyn Antalan, magmagna dagiti biktima iti kalsada idin ta inasitgan dagiti suspek ti lalaki a biktima sa kinabilda iti namin-ano a daras.
Inanawa ti babai a biktima dagiti suspek ngem kabayatan iti dayta a gundaway, pinarusokan isuna ti maysa kadagiti suspek sa imbaonna ti kabsatna a mangala iti pamagkongda isu a napan met nangala ti maysa a suspek iti getteng ket binagkongna dagiti biktima iti namin-adu a daras.
Nagsagaba iti lima a dunor iti pammagkong ti babai a biktima idinto a nagsagaba met iti sangapulo ket dua a dunor ti lalaki a biktima.
Rumrummuar nga imon ti rason ti pammagkong ta mapapati a saan a maawat ti maysa kadagiti suspek ti panagsinada iti biktima a babai a daytoy ket kinadennana iti las ud ti tallo a tawen ken kasinsinada, dua a bulan ti napalabas.
Segun met iti biktima a babai, nagsinada iti suspek gapu ta adda sabali a babaina.
Nupay kasta, naipaagas iti ospital dagiti biktima ket nakaruar met laeng a dagus ti babai ngem ti nobiona ti agtaltalinaed pay laeng iti ospital para iti naan-anay ti pannakatamingna.
Naala manipud iti nakapasamakan ti insidente ti getteng nga inaramat dagiti suspek.
Desidido met dagiti biktima nga idarum dagiti suspek a nangbagkong kadakuada.
