Posible a maipasango iti kaso nga estafa ti maysa a pet crematorium kalpasan nga imbellengda iti maysa a bakante a lote idiay San Jose del Monte, Bulacan ti bangkay dagiti 26 nga aso ken tallo a pusa imbes nga idalan iti cremation.
Kinontra ti Philippine Animal Welfare Society (PAWS) ti insidente ken kunada a panangallilaw kadagiti pet owner ti panagsingirda iti cremation service a saanda met nga ar-aramiden.
Segun iti PAWS, mabalin a sumrek iti kaso nga estafa iti salinong ti Article 315(2)(a) ti Revised Penal Code ti nasao nga insidente gapu iti mapapati a saan a husto a representasion kadagiti kliyente.
Inallukoy ti organisasion dagiti apektado a pet owner a mangipasa iti reklamo ken annadan dagiti resibo, cremation certificate ken dadduma pay nga ebidensia tapno makatulong iti imbestigasion ken panangsapul iti hustisia.
