Saan a malipatan dagiti Pilipino idiay Sri Lanka ti pananglagip iti Undas uray no adayoda kadagiti pamiliada ditoy Pilipinas.
Iti pannaki-uman ti Bombo Radyo Vigan ken ni Bombo International News Correspondent Priscilla Wijesooriya, agkaykaysada nga agisagana iti taraon ken mangurnos iti misa kas paset iti pananglagipda kadagiti pimmusay nga ay-ayatenda iti biag.
Babaen iti daytoy a wagas, mapagtalinaedda dagiti tradision ken pannakikaysada iti komunidad dagiti Pilipino uray addada iti nasao a pagilian.
Aminado daytoy a makapaliday a saanda a personal a makadua dagiti ay-ayatenda iti biag ditoy pagilian tunggal Undas.
Nupay kasta, patpatibkerenda lattan ti pakinakemda ken kapatangda babaen iti video call dagiti ay-ayatenda iti biag kas pannakikaysada iti pananglagip.
Kabayatanna, inladawanna met a nakappia ti sitwasion kadagiti kamposanto idiay Sri Lanka kagiddan ti panagbisita dagiti tattao tapno lagipen dagiti pimmusay a kapamiliada.
