Inallukoy ni Sen. Risa Hontiveros dagiti lokal a gobierno a mangikabil iti libre a drinking water stations ken cooling centers kas panagsagana iti posible a nakaro nga epekto ti El Niño.
Segun ken ni Hontiveros, nasken a makitinnulong dagiti LGU iti national government tapno masigurado ti access ti publiko iti nadalus a mainom a danum ken maliklikan ti dehydration, heat stroke, ken dadduma pay a sakit gapu iti nabara a panawen.
Insingasing pay ti senador nga aramaten dagiti pagadalan, library, museo ken community centers kas cooling shelters, idinto nga inallukoyna dagiti mall ken pribado nga establisimiento a mangilatang iti libre nga air-conditioned areas para iti publiko.
Impaganetgetna a kasapulan nga agtignay a dagus ti gobierno ken pribado a sektor tapno maksayan ti epekto ti nakaro a pudot.
