Nagpanawagan ni Sen. Francis “Kiko” Pangilinan kadagiti ahensia ti gobierno a nasapa nga agsagana ken mangiposision kadagiti relief goods kas panagsagana iti posible nga epekto ti El Niño.
Segun ken ni Pangilinan, karaman iti posible a maapektaran iti napaot a tikag, panagpangina ti presio ti taraon ken panagkapsut ti pagbiagan dagiti mannalon, mangngalap, ken pamilia a nababa ti pastrekna.
Inallukoyna ti Department of Agriculture, DSWD, DOH, DILG, Office of Civil Defense ken dagiti lokal a gobierno a mangidatag iti plano, agraman ti panangisagana iti suplay ti taraon, pasilidad iti panangurnong ken panagiwaras, transportasion ken dagiti alikamen a maaramat kadagiti lugar a posible a makapadas iti kinakurang iti danum.
Paset daytoy iti 8-point agenda ni Pangilinan tapno maksayan ti epekto ti nakaro nga El Niño, agraman ti panangtulong kadagiti mannalon ken mangngalap, panangsalwad kadagiti pagtalonan ken water systems, panangipatungpal iti price control, panangparmek iti hoarding ken profiteering, ken panangipasigurado iti pannakadusa dagiti ahensia ti gobierno.
