Impaganetget ti Department of Education (DepEd) nga amin nga akademiko nga aktibidad, pakairamanan ti online classes, ket masuspende no makadanon ti heat index iti danger level wenno saan a kumurang a 42°C iti dadduma a lugar.
Segun kenni DepEd Undersecretary Malcolm Garma, nasken a masuspende nga umuna ti klase tapno masigurado ti kinatalged ken liwliwa dagiti estudyante uray iti pagtaenganda.
Maibasar iti PAGASA, ti danger level ket 42 agingga 51°C no sadino ket posible a mapasaran ti heat cramps ken heat exhaustion, idinto nga adda posibilidad ti heat stroke no agtultuloy ti pannakaisarang iti nakaro a pudot.
Mabalin met nga irekomendar dagiti school heads ti pannakasuspende iti opisinada iti dibision ti DepEd uray no saan pay nga opisial a dimmanon iti 42°C ti heat index no nakaro ti pudot iti lugarda.
